BENKI YA MAENDELEO AFRIKA YAFANYA KWELI

Na kasabe100@yahoo.com

BENKI ya Maendeleo ya Afrika (AfDB) imeonesha nia ya kuisaidia Serikali katika kutekeleza miradi ya Uzalishaji na Usambazaji wa Nishati ya Umeme ili kuwezesha kuinua uchumi wa taifa.

Hayo yamebainishwa hivi karibuni wakati wa kikao kati ya Wizara ya Nishati na Madini kikiongozwa na Naibu Waziri wa Wizara hiyo Dkt.Medard Kalemani, Watendaji wa Wizara

na Wakurugenzi wa Taasisi zilizo chini ya Wizara na Wakurugenzi Watendaji 12 wanaowakilisha nchi zao katika benki hiyo.

Akizungumzia ushiriki wa benki hiyo katika kusaidia kuendeleza sekta ya umeme nchini, Dkt.

Kalemani aliwashukuru wajumbe kutoka AfDB kwa kufadhili miradi miwili ya umeme ikiwa ni pamoja na ule wa ‘Electricity 5’ uliowezesha kupeleka huduma ya umeme katika vijiji vitano uliokamilika miaka miwili iliyopita.

Pia aliishukuru AfDB kwa kufanikisha mradi wa ujenzi wa njia ya kusafirisha umeme kutoka Iringa hadi Shinyanga yenye urefu wa Kilomita 670 uliokamilika mwezi Desemba mwaka jana.

Akibainisha miradi ya umeme inayosubiri ufadhili ili iweze kutekelezwa Dkt. Kalemani alisema

kuna mradi wa Malagalasi unaohitaji kiasi cha Dola za Marekani 149 milioni utakaozalisha megawati 44.8 za umeme utakaowawezesha wakazi wa Kigoma kupata umeme.

Dkt. Kalemani alitaja mradi mwingine ni pamoja na wa Kakono unaotarajia kuzalisha kiasi cha Megawati 87 za umeme ambao utaambatana na Mradi wa Ujenzi wa njia ya kusafirisha umeme yenye urefu wa kilometa 88.8 kutoka Kakono hadi Kyaka kwa gharama ya dolla za Marekani 387 milioni.

Akielezea uwezo wa Shirika la Umeme Tanzania (TANESCO) katika kuzalisha na kusambaza

umeme, Dkt. Kalemani alisema Serikali inalifanyia shirika hilo mabadiliko makubwa ili liweze

kuendana na kasi ya Serikali ya Awamu ya Tano katika kufikisha huduma ya umeme kwa wananchi na kuongeza kuwa ifikapo 2020 asilimia 75 ya watanzania watakuwa wamefikiwa na huduma ya umeme.

Naye Mkurugenzi Mtendaji wa AfDB anayeiwakilisha Afrika Kusini, Mmakgoshi Lekhethe alisema wamefika katika kikao hicho ili kuweza kujua mipango na changamoto katika uendelezaji wa Sekta ya Nishati na kufahamu uwezo wa TANESCO katika kusimamia

miradi iliyoainishwa ili kufungua fursa za kiuchumi katika Kanda ya Magharibi.

Aidha, Mmakgoshi alieleza kuwa AfDB inatambua umuhimu wa Nishati katika kukuza uchumi

wa nchi na kuongeza kuwa kama wadau wapo tayari kuhakikisha Sekta ya Nishati inakuwa na

mchango mkubwa kwenye ukuaji wa uchumi wa nchi.